ليه ربنا ماعملش كده

كتب وجيه فلبرماير

هناك امور صعبة في صلب حياتنا وتقريبا ممنوع اننا نتناقش فيها، علشا كده انا اطلقت على مقالاتي التحليلية عنوان الكلام في الممنوع، وهي تلك الامور التى نمنع في الكلام فيها لانها تتعلق بالله او بالخلق او بالحرام او الدين او الجنس او اشخاص مقدسين او رموز يبجلها البشر ولايستطيعون الاقتراب منها.

وماذا لو طرحنا هذا الاسئلة وحاولنا الاجابة عليها، وهي اسئلة تحتاج الى اجابات عقلانية ومنطقية؟ هل هناك مايحظرنا من السؤال عن الممنوع؟

لقد خلق الله آدم الذي أخطأ الى الله، فطرده من الجنة، طيب ليه ربنا ماخلصش ادم وحوا من الخطية الاول وبعد كده سابهم يخلفونا، يعنى ايه ذنب مليارات البشر يتولدوا ليرثوا خطية فردين فقط، مش كان الاحسن ان ربنا يخلص ادم وحواء من الخطيئة باي طريقة وبعد كده كان يسيبهم يخلفونا من غير خطية ونعيش في راحة وسعادة؟

حاجة تانية برضه لازم نسأل فيها هو ليه ربنا ربط حياتنا بالشيطان، احنا مالنا وماله، يعنى الشيطان غلط في حق ربنا وربنا نفاه من السماء، ليه ربنا ماحطش البني آدمين في كوكب والشياطين في كوكب تاني بعيد عن بعض هو مش كفاية الخطية؟ كمان لازم مخلوق تاني ومش بنشوفه يوسوس في داخلنا علشان يغرينا بالشر كمان .. يعنى مش كفاية الشر اللى جوانا كمان باعت لنا مخلوق اقوى مننا يعمل لنا عملية اغراء وتهديد ويلبسنا كمان؟

حاجة تالتة مثلا لازم نسأل عنها هو لما ولد المسيح وربنا عارف ان هيرودس عايز يذبحه فارسل ملاكه لكي يهرب الى مصر ويقوم هيرودس بقتل اطفال بيت لحم الرضع، طيب ليه ربنا لم يصيب هيرودس بمرض عضال يقتله او يتعرض لعملية اغتيال فمكنش المسيح هايهرب لمصر ولا الاطفال البريئة دي تموت، ماذنب هؤلاء الاطفال ان يقتلوا بسبب المسيح؟

هو ربنا خلق ليه الحيوانات المفترسة الغضوبة اللى بتفتك بالغزلان والحيوانات العشبية المسكينة؟ ليه ربنا خلق في البحيرات تماسيح تفتك بكل حيوان اخر عايز يشرب بق ميه، وهو ليه ربنا خلق الفيلة الضخمة ووحيد القرن اللى بيفطر طن اعشاب كل يوم،  وليه خلق الفيروسات القاتلة التى تقتل الانسان والحشرات السامة التى تقتل الحيوان والانسان؟

هو ليه ربنا خلق الزلازل والبراكين والصواعق والبرق والفيضانات علشان تقتل مئات الملايين من البشر؟

وليه ربنا بيسيب الاطفال المساكين يصابوا بالسرطان والامراض الفتاكة والعمي ويعانون بلا ذنب او يولدون مشوهين او معوقين ، لماذا لاينقذهم ولا يشفيهم؟

وليه ربنا خلقنا نروح التواليت ، ماكنش فيه طريقة تانية نعيش بيها بدل العذاب ده؟ ماكنش فيه طريقة نتغذى بيها والجسم يمتص كل ماناكله بدون فضلات؟ وليه المرأة تتعذب في الحمل والولادة وممكن تفقد حياتها اثناء الولادة؟ ماكانش فيه طريقة الطف نتولد بيها؟

وهو ليه البشر عايشين مختلطين الشرير مع الطيب ويقوم الاشرار بتعذيب الابرار واذلالهم واضطهادهم في جميع انحاء العالم ، لماذا لاينتقم الله من الاشرار فورا ويريح العالم من شرورهم وسايبهم طايحين في باقي البشر بلا عدل ولا محاكمة؟

هو ليه ربنا مادناش كتالوج للحياة نقراه او نسمعه او يبقى مطبوع فينا نقضي به على الجهل ونعرف ايه الصحي وايه المؤذي لجسدنا وروحنا وانفسنا علشان نمشي عليه ويكون عندنا علم ينقذنا من المرض والضعف وليه ربنا مادناش حصانة طبيعية ضد الامراض والحصبة والكوليرا والاوبئة؟

ليه احنا لازم نكبر ونعجز ونصاب بالامراض وحالتنا تبقى منيلة بنيلة ونروح مصحات وبيوت مسنين والاطباء والممرضين والعمال يذلوا اللى خلفونا علشان نروح نعمل حمام؟

هو ليه السيد المسيح مجبش معاه جيوش من الملائكة ونسف الرومان على الكتبة على الفريسين وملك وحكم وطبق العدل بين البشري بدلا من ان يصلب ويموت ويقوم من الاموات، وليه احنا مش بنغلب الموت ونستمر في الحياة بدون شيخوخة وقبر؟

انا سمحت لنفسي ان اسأل هذا الكم ن الاسئلة “ليه ربنا معملش كل ده” وريحنا في عيشتنا ليس تمرداً على الله او شكاً في حكمته او انني حاشا امتلك عقلا افضل من خالقي ولكن كل اللى اقدر اقوله ان ربنا اداني عقل ولم يحظر علي ان افكر به واساله عن كل هذا

قد تكون هناك اجابة مختصرة لكل هذه الاسئلة معا تتلخص في الآتي: هو مين اللى خلقك؟ مش ربنا هو اللى خلقك؟ يبقى هو يصنع بك ويصنعك كما يرى وانت لاتستطيع ان تتشرط على الخالق او تسأله: “ليه ياربي عملت كده وماعملتش كده”.

زي مثلا المهندسين الذين بنوا البيوت وناطحات السحاب والابراج ليه عملوها كده وليه مصانع العربيات صنعتها كده وليه ماعملتش العربيات باربع ارجل بدل الاطارات وليه العربية طويلة ومش مكورة ، انت كمستخدم ماتقدرش تتشرط على المصممين والصناع.

انت كمستخدم ممكن تتساءل ليه لازم كل الناس او معظمهم يستخدموا نظام التشغل ويندوز ، وليه لازم بعد ماشتري الكومبيوتر اطفح دم قلبي علشان اجيب حماية وبرامج ضد الفيروسات وكل سنة ادفع ايجار السوفت وير وليه كل سنة يغيروا البرامج ويطلع عينك علشان تتعلمها من جديد؟ انت مش هاتقدر تروح تتشرط على شركات البرمجة والصناعة وتقولهم اعملوا كذا وماتعملوش كذا

ولكن رغم ذلك لازم نلاقي اجابة وهي ان مافيش اي شركة قدرت تنافس مايكروسوفت لتصنع نظام تشغيل افضل واسهل ولان زي مافيه مبرمجين فيه قراصنة قاعدين النهار والليل يخترقوا في السوفت وير علشان كده لازم تشتري برامج حماية .. يعنى فيه اجابة .. يعنى انت لازم تدور على اجابة.

وبرضه نفس الشئ مع الله ، ربنا خلقنا وهو اللى خطط ونفذ العالم بهذه الطريقة وهو اللى وضع الاسس والقوانين وهو اللى لبسنا في الشيطان احنا منقدرش نكون بنفسنا بديل عن الله او نخلق انفسنا بأنفسنا، لازم نوافق على كل اللى يعمله فينا ، ومانقدرش نقول هاندرو على اله افضل من الاله الحالي لان مافيش غير إله واحد.

ولكن من حقنا نسأل ونجد اجابة على كل الاسئلة اللى انا طرحتها ، صحيح احنا مش هانقدر نغير قوانين الله والطبيعة والاسلوب الذي يدير به الله هذا الكون وهذه الارض التى نعيش عليها ولكن نحن كمخلوقات عاقلة من حقنا نسأل ربنا ونقوله احنا عايزين اجابة يارب .. هذه ايضا من حقوقنا أن نسال الله ونقوله عايزين نفهم .. ليه عملت كده وماعملتش كده؟

Sharing is caring!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *