إضحك مع جو: مقالات ساخرة للكاتب جرجس ثروت

حلة ملوخية على دماغها !!!

16 يناير 201

في الفيلم بتاع شارع الحب وفيه فرقة حسب الله السادس عشر الفقيرة دقة , كانت بتستنى حلة الملوخية اللي بتدلقها عليهم سنية ترتر , ويجى عبد الواحد الذي كان محروم من الغموس أسبوع ينظف راس الفن برغيف ولا يكفيش جاديليو يقوم يجيب لهم العندليب عشان يشاركهم قوتهم وفقرهم والنابلسى يرفض , لكن جاديليو يرد عليه بأن رزقهم ورزقه على الله ومافيش حد بينام من غير عشي , يزعق عبد الواحد من فم معدته اللي بتصوصو وقاله : أنا يا سي جاديليو .

مع إن ساعتها كانت الناس أقل بكتير ودلوقتى وصلنا كام , وعشان كدا لازم نصرخ كلنا مع رياض القصبجى فيه اللي بينام من غير عشي ولا غطى كمان ولا حتى سقف على أربع حيطان يتاويه , وفيه اللي مش لاقى الفول بالزيت الحار , وبسلامته في الأرياف عاوز عيال وعزوة وكأنه في حرب مع إن الكبير قالها زمان العدد في اللمون ويرجع يقولك الأسعار بترتفع بجنون

والجنيه كل ماله في النازل وكأن صابه طاعون , يا أبو السباع أنت وعيالك اللي هتودى البلد للضياع , حتى الأرض اللي زمان كانت بتشبعك من خيرها بنيت عليها سكن للولد وقلت تغور يجى غيرها , وراحت وراحت أيامها وكل واحد بشفايفه يمصمص ويقولك أيام زمان وفين مكانها ؟؟؟ والبت مسعدة مرت سطوحي اللي مش فاضل منها غير عضمايتين على شوية جلد مقشف عاوزة تثبت للناس إنها من عالم النساء ولسه بتخلف , وما فضلش حيلتها غير الحبل يا ولداه تدارى بيه علتها

وتعال اتفرج عليها وعلى خلفتها , الواد فوق أخوه والبنات على بعضهم وكله في الشارع وتقولك يا ناس دا أنا شايلة همهم , وكيف وكيف هنادى سلفتها تحبل وتجيب الطناشر وهى يا عيني يادوب حبلة في العاشر !!! ويا سلام الموضوع دا لا ينفع فيه علام ولا كلام , حتى وإن كانت جامعية تقولك لو ما ربطهوش بالعيال يروحنى من عشية , واتاريكم ربطتم بلد ووقفتوا الحال , دا لا فيه العالم كله ارض تتحمل زيها وشالت أتقل من الجبال , هو يعنى لما الواحدة تخلف لها عيلين وتربيهم زين يبقى الدنيا اتهدت وتتعاير بيهم وكأنها عاقر

ولا التلفزيونات اللي بطلت من سنين كتيرة إعلانات تنظيم الأسرة عشان يحصل للسكان انفجار وتسقط الحكومات ويحل الخراب والدمار, وبفعل فاعل بقى إعلانات الحصان شغالة زن على الودان , وبقينا نخجل نرد على العيال لما تسأل : هو الإعلان دا عن إيه ؟؟؟ لكن لا كفاية نعمل طين وعجين للودان ونقول : يعنى جات علينا عن غيرنا إحنا مخالفين , أيوا يا سيدي أنت مخالف وزى الناس دي تقولها ولا مؤاخذة وأنت رايح الحمام , لكن بص في صوباعك تلاقى بصمتك غير كل البشر , ولازم يكون ليك رأى وضمير قبل ما تجيبوا ضلفها ولا هيكون ليك بكرا ولا ليهم , الصين بتغرم وتجرم ابوالعيال , وعشان كدا تلاقى لو فيه حد فاسد بيعلق نفسه عامود وإحنا هنا فاتحينها على البحري ومن غير حدود.

أبويا قالي !!!

14 يناير 2019

أبويا قالي : يا ولدى أمشى جنب الحيط .. مالناش حيل ولا قوة

وكنت فاكر إن تحت الحيط هلاقى مكان !!! ولا لقيت برا ولا جوا

تكون ماشى في حالك يجى غراب البين يستقصدك أنت وعيالك

تعبت أقول بكر أحسن ويجى عفش وكأنه بيؤدبنا بظلام حالك

وأتاريك يا تحت الحيط مر ويكفينا شر الحوجة ليك وسؤالك

أنا قلت لازم ابعد عن الحيط , وافتكرت اخويا قالي امى داعيالك

قلت يا بركة دعا الوالدين لما اروح أجيب حقي وحق حسين

والمصلحة ياولداه بسيطة واصل لكن وقف الحال ومن اين جالك

روتيني افندى قاعد بالديوان , وكأنه بتاع ابوه وبعد الفطور والشاي 

تلاقيه جايلك قالب السكة , ومصدر ليك الطرشة وبيحرق أبو عيالك

ع الساعة حداشر يا لقيته يا مالقتهوش ولو سألت يتقال لك أنت مالك

يا ناس فيه ورق عاوز توقيع صاحب المعالي اللي راح يدور على معالي

يومه بيكون بدايته ليله الحزين وصباحه بيدور على حباية للسهرة الجاية

والجهد قل والأعصاب اتوترت , وتلاقيه بيصرخ في الرايحة والجاية

ولو قدرت تنول الرضا وتوصل للمزاج الرايق يقولك اللوايح بتضايق

شوف يا حضرة أنا بدى أخلصك لكن السكة طويلة ومش هتوصلك

يخليك تخرج عن هدومك وطوعك وتروح تدور على سكة توصله بيها

وإلا مش خلصان يومك , ولو صوتك على الباشا يعمل لك محضرتعدى

وليلتك طين مش هتعدى , ويجى فيلسوف يقولك محتاجين كام جيل

عشان نتغير , برضوا دا اسمه كلام يا جدع هو إحنا في العالم لوحدنا

القانون لو يتطبق كان سقفها يجى على الفاسد ومراوح صدره تتطبق

وبالقانون الكسيح ذاته لما يقوم على حيله يتعدل العار ويبقى زين ومليح

الهرم بتاع جدنا خوفو بدأ من القاعدة مش من نافوخه , السوس تحت قطاع

عريض لازمن ندوسه , وقال إيه اللي خلاك هين يا خشب إلا سوسه

ولما يقولوا على الفساد مش قادرين وطريق الخلاص منه مش عارفين

وهما فين ومين يعرف طريق الموظفين , نقولهم برضك دا كلام يا ناس

وهو كل واحد دس إيده في جيبه وطلع عارف الناس دي ويقدر يكتبهم لك في كراس 

عاوزيين بس النية وتكون دلوكيت قبل عشية , هتلاقى يفضل فيها الزين

ويغور في داهية ابن شلبية وبتاع شوية عليك وشوية على 

الله يرحمك يا عب سلام بتاع البلهاريسيا لما قال :

طول ما تدى ظهرك للفساد عمر ما هيحصل تقدم للبلاد   

Sharing is caring!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *